Brunabótamat, vanmetnar fasteignir í Kjósinni

Borið hefur á því við skoðun á fasteignaskrár og á byggingaframkvæmdum hér í Kjósinni að brunabótamat er í of mörgum tilfellum ábótavant. Þetta getur haft mikil áhrif ef tjón vegna elds verður því brunabótamat íbúða á að endurspegla kostnað þess að byggja þær eftir altjón þannig að það verði sambærilegt því sem það var áður. Það er einnig ástæða til að benda fólki á að kanna skráningu fasteignar sinnar þ.e.s. hvaða byggingarstig fasteign er skráð á. Byggingarstigin eru fjögur samkvæmt núgildandi byggingarlöggjöf.
B1 – Byggingarleyfi
B2 – Fokheld bygging
B3 – Fullgerð bygging að utan og tilbúin til innréttingar
B4 – Fullgerð bygging.

Ef þig vantar upplýsingar um þína fasteig bendum við á að senda netpóst á skipulag@kjos.is

Brunabótamat hefur ekki áhrif á fasteignamat né fasteignagjöld íbúðarhúsa.

Gott er að huga að ef farið er í miklar endurbætur og hluti eignar endurnýjaður, getur verið ástæða til að endurskoða afskriftarár eignarinnar. Við það ganga afskriftir til baka að einhverju leyti. Þá eru þeir byggingarhlutar ekki taldir lengur frá þeim tíma sem húsið var byggt (til dæmis 1963) heldur frá þeim tíma sem þeir voru endurnýjaðir (til dæmis 2022).

Brunabótamat nær yfir efnisleg verðmæti eignar (til dæmis timbur, steypu, stál) og kostnað við byggingu, að frádregnum afskriftum vegna aldurs, slits og ástands. Brunabótamat húseigna afskrifast aldrei að fullu en á fyrstu 60 árum eignar afskrifast brunabótamatið að einhverju leyti. Gert er ráð fyrir að húsið hafi fengið eðlilegt viðhald. Auk þess er innifalinn kostnaður við að fjarlægja brunarústir.

Hér fyrir neðan eru svör við helstu spurningum sem HMS hefur borist og varða framkvæmd brunabótamats á fasteignum:

• Er hægt að sækja um endurmat á brunabótamati? Já. Íbúðaeigendur geta sótt um endurmat á brunabótamati með því að smella á þennan hlekk. Endurmatið er gjaldfrjálst, en umsókninni þarf að fylgja greinargóð lýsing á öllum endurbótum eða viðbyggingum sem hafa verið framkvæmdar á eigninni frá því að brunabótamat var síðast endurmetið. Þá þarf að fylgja með hvaða ár var ráðist í einstaka framkvæmdir og svo þurfa að fylgja með myndir af því sem talið er upp.
• Hvaða þættir eru metnir til hækkunar á brunabótamati? Íbúðaeigendur hafa ástæðu til að óska eftir endurmati á brunabótamati ef einhverju hefur verið bætt við eignina eða meiri háttar endurbætur hafa átt sér stað. Dæmi um viðbætur eru stækkun á húsi, skjólveggir úr timbri og sólpallur. Rétt er að nefna að steyptar eða hlaðnar stéttar, bílastæði eða steyptar verandir og steyptir skjólveggir eða garðveggir eru ekki í brunabótamati. Þá eru snjóbræðslukerfi heldur ekki í brunabótamati. Dæmi um endurbætur eru nýjar lagnir, nýjar innréttingar og ný einangrun. Viðgerðir sem teljast eðlilegt viðhald á húseignum eru þó ekki metnar til hækkunar á brunabótamati.
• Er tekið tillit til lóðaréttinda og gatnagerðargjalds í brunabótamati? Nei. Brunabótamat nær einungis yfir efnisleg verðmæti eignar (til dæmis timbur, steypu og stál) og kostnað við byggingu, að frádregnum afskriftum vegna aldurs, slits og ástands. Auk þess er kostnaður innifalinn við að fjarlægja brunarústir.
• Á brunabótamatið að endurspegla markaðsvirði íbúðar? Nei. Brunabótamat íbúða á að endurspegla kostnað þess að byggja þær eftir altjón þannig að það verði sambærilegt því sem það var áður. Matið er svo endurskoðað árlega út frá verði á byggingarefnum (til dæmis steypu, stáli og timbri) og uppfærist þess á milli mánaðarlega með byggingarvísitölu.
• Hver er munurinn á fasteignamati og brunabótamati? Fasteignamat er byggt á markaðsvirði, m.a. á verði á kaupsamningum á fasteignamatssvæði eignarinnar fram í febrúar árið á undan. Brunabótamati er ætlað að endurspegla þann kostnað sem það myndi kosta að fjarlægja brunarústir og byggja húsið aftur ef til altjóns kæmi. Það er alveg óháð markaðsvirði eigna hverju sinni en byggir fyrst og fremst á verði á t.d. steypu, stáli og timbri og mannatímum þeirra sem koma að því að byggja húsið.
• Fyrsta brunabótamat
  Þegar eign er tekin í notkun, eða er skráð fullgerð, gefst eiganda kostur á að koma á framfæri ítarlegum upplýsingum um eignina með beiðni um fyrsta brunabótamat svo brunabótamatið endurspegli sem best efnislegt virði eignarinnar. Forsenda þess að eign sé tekin í notkun samkvæmt byggingareglugerð er að farið hafi fram öryggisúttekt af byggingafulltrúa sveitarfélags.

Nánari upplýsingar um framkvæmd brunabótamats og hvernig sækja má um endurmat brunabótamats má finna með því að senda netpóst á skipulag@kjos.is

Heimildir HMS

Kjósarhreppur 2024