Bréf frá sveitarstjórn í tilefni af Vordögum í Kjósinni

Kjósin okkar er einstaklega falleg sveit sem við getum verið stolt af, þó má alltaf gera betur.

Dagana 25.-28. apríl verða haldnir Vordagar í Kjósinni. Tilgangur daganna er að hvetja alla til að huga að umhverfi sínu, hvort sem það er með því að taka til hendinni eða bara að njóta útivistar í sveitinni. Við ætlum að byrja smátt en vonandi munu þessir Vordagar festa sig í sessi og viðburðum fjölga ár frá ári.

Hér má sjá örfáar tillögur að verkefnum sem hægt væri að vinda sér í á Vordögum:

• Fara í sitt nærumhverfi með poka og tína upp rusl sem hefur fokið af stað og lent undir snjó áður en það hverfur í gras og gróður.

Stóri plokkdagurinn er 28. apríl og ekkert því til fyrirstöðu að taka forskot á hann.

• Bændur gætu farið út að tína rúlluplast sem alltaf vill strjúka frá eigendum sínum yfir vetrartímann.
• Gamlar girðingar sem ekki eru í notkun eru aldrei fallegar og því eru Vordagar góður tími til að fjarlægja þær og koma á gámaplanið.
• Vordagar eru gott tækifæri til að drífa sig út í náttúruna og ganga á fjöll eða bara fá sér léttan göngutúr á jafnsléttu. Svo er líka alltaf gaman að fara í fjöruferð. Ekki verra að hafa með sér poka :)

Sveitarstjórn mun að sjálfsögðu leggja hönd á plóg og á Vordögum ætlum við til dæmis að fara í gegnum nytjagáminn á gámaplaninu og taka til í kringum Ásgarð.

Við vonum að sem flestir taki þátt í þessu verkefni með okkur og mæti svo að loknum góðum tiltektardegi á planið við Ásgarð laugardaginn 27.  klukkan 16:00 í grillaðar pylsur.

Með vorkveðju,

Sveitarstjórn Kjósarhrepps