Hér birtast loks síðbúin úrslit 

Hestamannafélagið Adam í Kjós stóð fyrir gæðingakeppni á beinni braut í Kjósinni um síðustu helgi. Keppt var í A- og B-flokki auk gæðingatölts.  Mótið var opið gestum og ekki er hægt að segja annað en að gestrisni Adams hafi orðið félagsmönnum að falli. Það voru nefnilega gestir sem “stálu” sigrum í B-flokki og tölti en A-flokkinn tóku félagsmenn alveg.

Sjá mátti mjög skemmtileg tilþrif og var andrúmsloftið í úrslitum A-flokksins mjög rafmagnað þar sem Siggi rafvirki fór mikinn. Það dugði þó ekki nema í bronsið. Gesturinn Hallgrímur Óskarsson stórsmiður nelgdi og heflaði bæði B-flokkinn og töltið. Hallgrímur var ásamt gæðingnum Dróma frá Reykjakoti valinn glæsilegasta parið, þrátt fyrir að aðrir knapar hafi tjaldað skærrauðum hælhlífum ,háglans reiðstígvélum, hvítum buxum og brilliantíni. Adam sækir nú fast að Hallgrími að gerast félagi.

Annars voru úrslit sem hér segir:

B-flokkur:                                                                                         

1. Hallgrímur Óskarsson á Drómi frá Reykjakoti – 8,65

2. Haukur Þorvaldsson á Kulda frá Grímsstöðum – 8,35

3. Gyða Árný Helgadóttir á Þyrsli frá Strandarhjáleigu – 8,10

A-flokkur:

1. Orri Snorrason á Staki frá Höskuldsstöðum – 8,45

2.  María Dóra Þórarinsdóttir á Mörtu frá Morastöðum. 8,40 (knapi í forkeppni; Orri Snorrason.

3.  Sigurður Ólafsson á Jesper frá Leirulæk – 8,20

Gæðingatölt:

1. Hallgrímur Óskarsson  á Drómi frá Reykjakoti – 8,70

2. Vilhjálmur Þorgrímsson á  Sindra frá Oddakoti – 8,35

3. Sigurður Guðmundsson  á Staki frá Höskuldsstöðum – 8,25

Glæsilegasta parið: Hallgrímur og Drómi.

Adam þakkar fyrir frábært mót og bráðskemmtilegt grillpartý í Blönduholti eftir mótið- það var fjör, það var glens; þetta var algjört geim og enn eru ekki allir komnir heim!

Stjórn Adams.

p.s. sá sem tók hest í misgripum eftir partíið þarf ekki að skila honum.

meira...

26. ágúst 2010, 11:16 - Tveir synir stólpahryssunnar Pyttlu frá Flekkudal eru í úrslitum í fimmgangi á Íslandsmóti fullorðinna, sem nú fer fram á Sörlastöðum í Hafnarfirði. Það eru stóðhestarnir Glymur 7 vetra (8,52), undan Keili frá Miðsitju, og Frægur 8 vetra (8,04), undan Gusti frá Hóli. Knapi á Glym er Hinrik Bragason en á Frægum Sólon Morthens. Pyttla er undan Adam frá Meðalfelli og Drottningu frá Stóra-Hofi, Náttfaradóttur frá Ytra-Dalsgerði.

meira...

Hreppsnefnd mun funda 1. fimmtudag í hverjum mánuði og á öðrum tíma ef þurfa þykir. Fundirnir vera haldnir í Ásgarði og hefjast kl 13.00 og eru öllum opnir.

Breyting verður á viðveru byggingafulltrúa. Hann mun verða við á fimmtudögum framvegis, frá kl 10.30.

meira...

Vegna fjölda áskorana var ákveðið að færa gæðingakeppni Adams af Eyrinni á braut sem búið er að útbúa í landi Tindsstaða í Miðdal- rétt neðan við Morastaði. Þátttaka ætlar að verða góð en þegar hafa ýmis missnjallir knapar skráð sig. Reiðmaðurinn mun mæta! Bjarni á Þorláksstöðum er á óskalistanum og er skorað á reiðundrið að láta sjá sig. Ef fólk sér Villa Þ. villuráfandi í fjörunni á laugardaginn, þá á alls ekki að segja honum frá breyttum mótsstað.
Kjósverjar fjölmennið! Siggi á Ein-Staki mætir allvígalegur.
Stjórn Adams
 

meira...

Hestamannafélagið Adam heldur keppni á beinni braut niður á Hvalfjarðareyri, laugardaginn 21 n.k.  Fyrirhugað var að halda keppnina við Félagsgarð, en þar sem svæðið er í útleigu á sama tíma, ákvað stjórn Adams að færa keppnina á Eyrina. Það kom þó til máls að fresta keppninni, en eftir nákvæma athugun og djúpar umræður var ákveðið að standa við áður ákveðna dagsetningu. Vitað  era ð flestir færustu knapar landsvæðisins milli Kiðafellsár og Botnsár hafa æft stíft fyrir þessa keppni.  LH getur frestað LM en Adam frestar ekki boðuðum uppákomum.

Keppt verður í A-og B-flokki auk gæðingatölts ( hægt tölt, hraðabreytingar og yfirferð).

Þátttökugjald kr. 1000 p. grein.

Keppni hefst kl. 13:30 – Skrá þarf í síðasta lagi föstudaginn 20. Skráning í s: 848-7100 og 895-7745, fínt að senda SMS líka,  eða  með pósti á bjossi@icelandic-horses.is 

Spáin er góð – þar verður fjör í fjörunni! Finnur einhver Villa í fjörunni? Kjósverjar, Dolluna heim! Látum ekki villta tryllta Villa taka okkur í reiðkennslu, aftur. Mætir Reiðmaðurinn? Mætir Bjarni á Þorláksstöðum?

Mætir einhver?

Stjórn Adams

p.s. Fallegasta parið verðlaunað.

meira...

Ungmennafélagið Drengur í Kjós var stofnað 1. eða 15. ágúst 1915. Í fyrstu bókum um félagið stendur að félagið hafi verið stofnað 1.ágúst en samkvæmt heimildum og  einnig kemur það fram á formannamyndunum í Félagsgarði , þá er það 15. ágúst.

Stofnendur UMF Drengs voru 31 og þar meðal voru 2 konur og var það Þorleifur Guðmundsson sem var aðalhvatamaður að stofnun þess.

Fyrsti formaður félagsins var Þorgils Guðmundsson frá Valdastöðum og með honum í stjórn voru þeir Ellert Eggertson frá Meðalfelli og Halldór Jónsson frá Káranesi

Aðalmarkmið með stofnun félagsins var að efla íþróttaáhuga Kjósverja og átti félagið mörgum góðum íþróttamönnum á að skipa bæði í glímu og frjálsum íþróttum. Mót voru haldin á milli Aftureldingar og Drengs og var fyrsta mótið haldið á Kollafjarðaeyrum árið 1918.

Þeir voru kröftugir félagsmenn í Dreng á árum áður og byggðu sér félagsheimili 1945 og var það nefnt Félagsgarður, var það fyrsta ungmennafélag á landinu sem byggði sér sitt eigið félagsheimili.

UMF Drengur gaf einnig ú blað, 1916 og hét það fyrst Draupnir og breyttist síðan í Hreiðar heimska haustið 1917, en Hreiðar heimski var einn af hinum nafnkenndu, fornu íslendingum og var honum lýst þannig" Mikill vexti, en ljótur á yfirlit og þótti varla sjálfrátt fyrir vitsmunasakir. Hann var styrkur að afli, manna fóthvatastur og hógvær í skapi" Upphafsmenn blaðsins lýstu því við íslenskan sveitaungling og mátti það bera nafn íslensks bóndasonar, þess er ekki þótti með öllu mannvænlegur í uppvexti, en varð þó ekki alls varnað.

Blaðið kom að jafnaði út 6-7 sinnum á ári, í tugi ára og var markmið þess meðal annars að fræða og hvetja

Í dag má segja að frekar lítið líf sé í "Drengnum" en vonandi vaknar hann úr dvalanum á síðustu árum fyrir aldarafmæli sitt

meira...

Í  útivistar- og hestamannamessunni á sunnudaginn, 1.ágúst,  var kirkjunni afhentur nýr hökull að gjöf. Gefendur eru þau Magnús Sæmundsson og Guðrún Ó Tómasdóttir Eyjum II  í tilefni 150 ára afmæli Reynivallakirkju á síðasta ári. Gjöfin er til minningar um móður Magnúsar, Láru Magnúsdóttur húsfreyju að Eyjum II í Kjós eins og fram kemur í gjafabréfi en þar segir:

Lára Magnúsdóttir fæddist þann 10. mars 1896 að Lambhaga í Mosfellssveit en fluttist ung að aldri ásamt foreldrum sínum að Eyjum og bjó þar til æviloka, en hún lést þann 6. október 1959.

Í tilefni af 150 ára afmæli Reynivallakirkju viljum við færa kirkjunni að gjöf hátíðarhökul, stólu og klæði á prédikunarstól, hannað og ofið af Elínu Stefánsdóttur veflistarkonu, til minningar um Láru.

Guð blessi Reynivallakirkju, sóknarbörn og prest.

Magnús Sæmundsson, Guðrún Ó. Tómasdóttir.

Hökullinn er ofinn með damaskvefnaði þar sem uppistaðan er silki en ívafið ull, í munstri er einnig gullþráður. Munstur á baki hökulsins vísar til liljunnar sem er Maríutákn en Reynvallakirkja var frá fyrstu tíð helguð Maríu guðsmóður, á púltklæði, stólu og hökli að framan er krosstákn.

Séra Gunnar Kristjánsson, sóknarprestur  þakkaði fyrir hönd safnaðarins þeim hjónum þessa veglegu gjöf sem ber vitni um hug þeirra hjóna til móður og tengdamóður, en jafnframt til kirkjunnar og kirkjustarfsins. Gjöfin verður kirkjunni til prýði og gefendum til sóma um ókomin ár.

meira...

Fjölmenni var í brekkunni við Kaffi Kjós á sunnudagskvöldið í notalegu umhverfi og hlýddu á tónlist Ella og Eyva.

meira...

!!!! ath !!!!  Skráningarfrestur rennur út á miðvikudagskvöld...

Jæja, þá er hrossapestin að mestu að baki og flestir áhugasamir hestamenn farnir að ríða út í blíðunni. Hestamannafélagið Adam hefur ákveðið að standa fyrir hópreið líkt og gert var í fyrra. Þó með aðeins öðru sniði þar sem hross eru almennt ekki í mikilli þjálfun.  Hópreiðin verður nú farin frá Laxárnesi, laugardaginn 7. ágúst, mæting kl. 14.  Riðin verður góður hringur upp með Laxá, og til baka aftur og snæddur gómsætur grillmatur á eftir.  Adam hvetur sem flesta til að vera með en verði er mjög stillt í hóf eða kr. 1500 á mann. Innifalið er matur og gos – þeir sem vilja skola steikinni niður með öðru gera viðeigandi ráðstafanir. Þátttöku verður að tilkynna eigi síðar en 2 ágúst – það má ekki klikka. Tekið er á móti greiðslu á staðnum – seðlar eingöngu! Þátttaka tilkynnist með pósti á petur@emax.iseða bjossi@icelandic-horses.isnú eða með símtali eða SMS í 895-7745 eða 893-1791

Þá er fyrirhugað að halda gæðingakeppni hinn 21 ágúst n.k. Sú keppni verður auglýst nánar síðar, en nú er um að gera að fara að brýna gæðingana fyrir átökin.

Sjáumst hress

Stjórn Adams

meira...

 Hér situr sigurvegarinn í barna og unglingaflokki Arna Petra Sverrisdóttir á rúllunni sinni, en hún sigraði í heyrúlluskreytingunum á Kátt í Kjós 2010

Verðlaunin hennar er að fá að fara á hestbak hjá Bjössa og Bíbí á Þúfu í Kjós

meira...

Dýrbýtur er á ferðinni í kringum Meðalfellsvatn. Tvær kindur fundust bitnar og dauðar í Dælisá í dag, lamb hefur fundist dautt í skurði og sést hefur hundbitið fé á lífi. Þetta er háalvarlegt mál og eru hundaeigendur beðnir um að hafa hemil á hundum sínum, hvort sem um er að ræða bændur, íbúa, sumarhúsaeigendur eða gesti í sveitarfélaginu. Þeir sem sjá til hunda vera eina á flakki eða að hamast í fé eru vinsamlegast beðnir um að hafa samband við skrifstofu Kjósarhrepps, oddviti@kjos.is eða í síma 5667100.

Vert er að hafa í huga að hundur sem  staðinn að verki við að hamast í búfé er  réttdræpur

meira...

meira...

 Annað sætið í flokki barna og unglinga hlaut að þessu sinni Sunneva Líf Albertsdóttir og hlaut hún að verðlaunum veiðidag í Meðalfellsvatni sem gefin var af Veiðikortinu.

meira...

 Þriðja sætið í keppninni, flokki 16 og eldri, hlaut Ína Skúladóttir og stendur hún hér við rúlluna sína. Verðlaunin í þriðja sætið gefur lífræna búið, Biobu á Neðra-Hálsi

meira...

 Sú sem var í fyrsta sæti í heyrúlluskreytingum á Kátt í Kjós, 16 ára og eldri er Sigrún Linda Karlsdóttir og situr hún hér stolt við rúlluna sína.

Matarbúrið á Hálsi styrkir keppnina og gefa matarkörfu fyrir 1. sætið

meira...

    Það er ljót aðkoma að hliði Endurvinnsluplansins núna dag eftir dag.

Af hverju gerir fólk þetta?

Þekkir einhver ruslið sitt?

 Það er gönguhlið sem alltaf er opið og fólk þarf aðeins að ganga örfáa metra með ruslið sitt til að koma því í gám og þá þurfum við hin ekki að horfa uppá svona ófögnuð í okkar fallega umhverfi.

Tökum okkur á og gerum ekki svona aftur

meira...

Mikill fjöldi gesta sótti Kjósina heim í dag í blíðskapaveðri, en núna þessa stundina bíða samt flestir eftir úrslitum í Íslandsmeistarmóti Poulsen í heyrúlluskreytingunum en hópnum var skipt í tvo flokka, barna og unglinga og eldri.

Úrslir urðu þessi í barna og unglingaflokki:

1. Anna Petra Sverrisdóttir rúlla n 3

2. Sunneva Líf Albertsdóttir rúlla n 137

3. Dagmar Ísleifsdóttir  rúlla n 5

Flokki eldri:

1. Sigrún Linda Karlsdóttir rúlla n 126

2. Aron Bergmann Magnússon rúlla n 25

3. Ína Skúladóttir  rúlla n 59

Öllum er þökkuð þátttakan og vert er að benda fólki á að það eru þvílík listaverk á Laxárnestúninu að ekki hefur sést annað eins fyrr en nú.

Fjöldi styrktaraðila komu að þessari keppni og má þar fyrst nefna, Poulsen sem styrktu um málningaspreyið, Matarbúrið, Biobu, Kú.is, Veiðikortið, Heistaleigan Þúfu og fleiri gefa verðlaunin.

Bið vinningshafa að senda skeyti á gudnyi@simnet.is

og fundinn veður góður tími til verðlaunaafhendingar

meira...

Þetta er annað árið sem þessi keppni fer fram, en í fyrra gerði hún stormandi lukku og það var stöðugur straumur fólks eftir mótið að skoða listaverkin.

Keppnin fer fram á Laxárnestúninu neðan við Félagsgarð og hefst kl.13.30 og stendur til 15.30.  Bestu rúllurnar verða síðan valdar kl. 16 og nöfn vinningshafa birt á kjos.is

Keppendum verður skipt upp í 2 flokka, það er að segja 16 ára og yngri og 16 og eldri.

Hver keppandi fær eina rúllu að vali til að skreyta, málningasprey verður á staðnum til afnota, en gott væri að þeir sem ætluðu að taka þátt hefðu með sér spray eða annað efni til  að auka fjölbreytnina í skreytingunum.

Skráning fer fram á staðnum en þátttakendur skrá nöfn sín og símanúmer á blað og fá númer sem þeir auðkenna sína heyrúllu með.

Gaman væri að sjá alvöru og hámenntaða listamenn koma og spreyta sig á rúllunum

Umsjón hafa Jóna og Kristín í Miðbúð, jonathors@simnet.is

meira...

 Myndin Liljur vallarins eftir Þorstein Jónsson verður sýnd kl. 13 og kl 15 í Ásgarði, en sögusvið myndarinnar er Kjósin. Í myndinni er tekist á við stóru spurningarnar - um Guð, tilgang lífsins og dyggðirnar. Þorsteinn mun svara fyrirspurnum eftir sýninguna kl, 13.

Kjósarmyndin frá 1952 verður svo sýnd kl. 16.30.

Einnig verða í Ásgarði til sölu gamlar bækur úr bókasafni hreppsins og kostar hver bók kr. 100.-

Hægt verður að skoða gamlar myndir frá skólaárunum í  Ásgarði.

Kvenfélagið verður með kaffi og kleinur til sölu.

Opið verður í Ásgarði frá kl.13 til 17.

meira...

Hljómsveitin Músefjun

meira...